ديوان حواديت نص الليل

C. V

حدُّوتة قبل النوم
وجراب الحاوى..
الطفل السارح
جوّايا على ضهر حصانه
الخَشَباوى..
صندوق الدنيا
والحلم
الفاتح ڤاترينته
فتافيت السُّكَّر
والبسكوت ابو وِشّ
كريمه
والشكولاته الدايبه
تَمَلِّى
على طرف لسانى..
أمى
وابويا
والحضن الفارد دراعاته
مليان حنِّـيَّه
بتتولِّد
من غير نهايات..
* * *
مدرستى
وطابور الصبح
اللِّى ماشافنيش
واقف
ويّاه..
زملاتى
والكورة الحيرانه
ما بينّا
في الحوش الواسع..
الفصلْ
ودروسى
الرافض أسمعها
تخْبِيطى الأرض
عشان ما اذاكرشى
والستّ سنين
الواخدين العمر
معاهم
إعدادى
ف ثانوى..
ومحاولة إنى أبان عاقل
وكبير
علشان الناس
تفرح بيّا
وتقول: راجل..
إحساسى
ولأول مرّه
بحلاوة البنت
الأموره..
ومناغشاتى
أنا وصحابى
قُدّام النيل
أبو هيبه
تخضّ..
ع الكوبرى
الواصل أحلامنا
ببعض
ونتيجة الثانويّه العامّه
ونهاية تهتهة القلب
المتخبّى
فْ أحضان الطفل..
* * *
الجامعة
والسور الساكن
ملامحها
الدنيا التانيه
غير اللِّى أنا عشت
كتير جوّاها..
حكايات الحب
المجنونه
القلب المتعصب
دايمًا
علشان محبوبته
مش عايز حدّ يكلّمها
غيره
الانتخابات
واتحادات الطلبه
الامتحانات
ومذاكرة آخر أسبوع..
الجرى
عسكر
في معسكر..
الفرحه الزايده
والدنيا لما تحطّ الرقعه
السودا
في عينيه..
الخوف من بكره
وسؤالى
المستغرب جدًّا
رايح فين؟!!!
الشهادات
اللِّى بتحلف
أنى أخدت الختم
نهائى
أدّيت الخدمه..
سقَطَان الأوراق
م الشجرة..
إحساسى
بإنى خلاص
مابقاش جوايا
إلاّ عينين
محتاجه تركِّز..
* * *
الشعرايه البيضا
اللِّى ف راسى
بتونِّس إخواتها
علشان يتفقوا
عليّا..
العمر
بيغير جلده..
الفرس الراكب
فوق كتفى
مش قادر أكمل
بيه..
باستنفد أحلامى
بسرعه
وبازقّ حبال الصوت
اسمع غناويها..
أزغد قلمى
يمكن ينطق
ويقول أشعاره
اللِّى تملِّى كانت بتداوى..
أهرب
وارجع
واحدف نفسى
على أقرب كرسى..
يتهيَّأ لى إنى ارتحت
أسند على إيده
واقوم... اتكعبل...
رجليّه
ترفض تساعدنى
ودموعى
تفتح شرايينى
علشان تبلعنى..
الأوضه المقفوله
فْ صدرى
بتضيق
والكراكيب
بتدور حواليّا..
أشعر إنى باموت
من قبل ميعادى..
أنبش فتافيت
الذكرى
واركن راسى
فْ خدة
حدُّوتة قبل النوم
واتمنّى
لو بس أعود لجراب الحاوى

**********

كسوف كلى

بقيت حاجاتى كلها
في السندرة
عدُّو السنين.. بعد السنين
ولا جيت أزور أهلى
ولا خطيت حدود البيت
* * *
كل اللِّى شوقهم ليّا
خلاّهم حزانى
ع الكراسى الميتة
قاعدين دموعهم شاقَّه
في خدودهم
مدن
دايبين من الهجر الأليم
دايب من الصبر
اللِّى عمره ما مدّنى
بِعَتاد سفر
حرَّان في عزّ التلج
محتاج الرجوع
والسُّور بيعلا
عند نقطة الالتقاء
عمّاله تبعد كل حاجه
يا كلّ مين مستنِّى أرجع
البحر زق شطوطه
زوِّد في الغرق..
* * *
شحات ومدّ إيديه
ينادى على البشر
يا محسنين لله
أنا محتاج لِبَر..
* * *

مَحْنِى كما الجبل القديم
الريح بتعوى
والديابة تردّ
يتعرّى من فوقه لتحته
ينحنى أكتر يدارى دمعته
تضحك عليه الخلق
يصرخ
يخرج صدا صوته
ورق
ملزوق على ضهر الحيطان
مفقود بقالوا كتير أوى
اللبس غطَّاه العُفار
السنّ لسّه ما اتْحَسَبْش
هيئتة ماقدرش أوصفلك
سوى إنه غريب

مالهوش وطن
* * *
حبة ورق ع الأرض
ضاعوا واتنسوا
يا ده الغريق
لسَّاك بتستنى الطريق..
* * *
قاعد في صالِةْ الانتظار
والطيَّارات بتزقّ بعضيها
تسابق نفسها
والتيّارات
بتزقّ جوّايا الهوا
تنفخ مشاعرى.. تنفجر
تدارى في الوش الخشب
قالوا مطار الحلم

مليان بالسفر
قلت المطر
مهما نزل ع الميّتين
ما بيرجعوش م الموت

**********

مسمار في النعش

قالوا البعيد عن أرضه
لازم يوم يعود
وانت البعيد
وانا عمرى ما اتمنيت أعود
* * *
مرتاح وانا لوحدى؟!!
- أكيد..
أقربها عايش والسلام
الصمت قاسم ويَّا منى لقمتى
والهمّ بيزورنى ليلاتى
يودّنى..
الحزن بيطبطب عليَّا
بْدمعتى

أصحاب بنتلملم نغنِّى
للسما.. للبحر.. لليل الطويل
مابنختلفش فْ أىّ شىء
* * *
على سلِّم الطيَّارة
فارقت اللِّى فات
قرّرت أغادر
قررت أهرب
مش فارقة
لكنى حاولت انسانى خالص
وبرغم إنى حزين قوى
طاير من الفرحه
لأنّى ف غربتى
عايش وحيد
لا ودانى غرقانه في كدب

مالوش قرار
ولاعينى تايهه فْ كُبّايات
مليانه قهر
على القهاوى بتتشرب
ولا حاسس انى باموت
روتين
علشان قانون الجاذبيه
عندنا...
بيأكّد ان الحلم
لازم يندفن
جوّا التراب
* * *
مسمرت تابوتى بإيدى
مش قادر اوصف قدّ إيه
حسّيت براحه

وضّبت قبرى
زىّ ما اتمنّيت زمان
فاضى.. وليه شبّاك
على البحر العفيف
مليان ترابة زعفران
وف وسطه
راقد في التابوت
مخلوق
ياريته ما كان قابلنى

**********

البرزخ

نزوح من عالَم التوابيت
هروب دايم
محاولهْ لافتعال الصبر
مش نافعة
مراره بتنتزع جوفك
فتتغابى.. وتستعظم..
تزوم الريح على حروفك
كما القشّه ما تثبتشى
تروح تجرى.. وتتخبا
ورا صمتك
ورا زْعيقك
ورا أىّ احتمال ممكن يسلّط نور
على رجولتك

* * *
بعيد.. أبعد
وأبعد م البعيد.. تبعد
وتستغفر جنوحك بيك
جاوبنى.. مين هيغفر لك؟!!
هطول السمّ فوق روحك
إليك.. منك
شرودك.. دمعتك.. خوفك
جاوبنى.. مين هيغفر لك
ذنوبك فيك؟!!
ما تستموتشى
ع الطرقات
ما تستعرضشى
أحزانك على الاّرصُفْ

ماتعملشى الألم براويز
رحيلك.. رغبتك وحدك..
وصعلكتك
عشان تستعطف الماشيين
مابتكفّيش
* * *
وصول للمعبد الملعون
مافيش غيرك
وشيطانك
بيتجسد في كلّ مكان
على آخر صليب مشدود
وع الكرسى بيتمطع
وفى القاعدين
بياخدوا الحكم.. قدامك

وفى الجلاّد
حقيقة واحدة كان.. هوَّ
وكنت انتَ...
برود بيسُود
برود بيسُود
وكنت انتَ... تابوت مقفول

**********

بلياتشو

أحيانًا
بِتْرُصّ الأوجاع نفسيها
على كتف الواحد
وبتضغط على كل ملامحه
تستنزف
بواقيه الحيّه
تتشبع أحاسيسه
دموع
وتمطّر على كل سنينه الفايته
سواد
فيغمّض عينه
تتقصّ الصورة ما بين جفنيه
وينقّط حزن

* * *
أحيانًا
بتهون الذكرى
الأحساسيس الحلوه
الضحكات
بتهون حكاوينا بتاعة بكره
ونشدّ إيدين الهمّ
نحطه ما بين أحضانّا
ونسيبه يفروِل أيامنا
وندوس على كل حاجتنا
الباقيه
نتخبا
فْ قلب بياض الشعر
والشيب المالك تفاصيلنا

من قبل ميعاده
* * *
أحيانًا
بتحسّ ان انت ما فيش
صفر على شمال البنى آدمين
ولا عمرك حبّيت الدنيا
ولا كان لك صاحب
ولا ينفع أبدًا تتحب
* * *
أحيانًا
بَابكى
وباتعاطى حبّات الصمت
أحيانًا باغضب
أتعصب

لكنى دلوقتى عرفت
إحساس البلياتشو
ف لحظة ما الناس بتروَّح

**********

رقعه سودا

مُولِد.. وزفّه..
والحصان الابيض.. وقلب
فوق الجناحات القديمه
للخيال
جربت اطير
وطلعت فوق
قد امّا قِدْرِتْ فرحتى
بصِّيت
لضحكات السحابات البياض
قلبى انشرح
وفْ نظرتى بان الفرح
خبّط على بابى الصغيَّر
فانفتح

شبيت من اللهفه
أسابق لحظتى
طلّيت على ضَىّ الشموس
قابلت أحلامى البريئة
ف قوس قزح
حسِّيت
بطعم انك تكون عندك سما
واسعه وْبراح
شَبِّيت زياده في الفضا
سقطت على دماغى حاجات
م الذكريات
أتارينى م الفرحه
سرحت
فاتكعبِلِتْ رجليَّا

في شريط اللِّى فات
صحّتنى من حلمى البسيط
فُقت انجرحت
زاد الألم.. الغيم هجم
أرسل جيوشه
تستردّ الحلم منّى
صابنى الفزع
صابه الجنون
داس الجناحات القديمة للخيال
ضىّ الشموس
القوس قزح
كسّر على دماغى السما
فلتت من الإيد نظرتى
فوقعت تحت

ووقعت تحت
ووقعت تحت
الحفرة زادت وانتشت
ورجعت
زى ما كنت دايمًا في الحياة
رقعه في ديل الحزن
غطّاها السواد

**********

ضربة شمس

الساقية دايره
في البراح
والجنّتين خضره
بيسعوا يلقطوا
رزق الحياة
شايلين ما بينهم
ترعة بِكر
ما داقتش من مية
غسيل الهمّ
لسه ع الحميد
شمس الأصيل
راكبه على اكتاف النهار
بتمدّ إحساسها

تودّع يوم قديم
عمّاله تنزل جوّه توب البعد
تنزل
جوه توب البعد
تنزل
جوه توب البعد
تنزل
فينا غابت واترمى
في القلب رجفه
(الليل على ابوابنا
خلاص
اتلمُّوا يا اهل السعى
في بيوتكم
خلاص الهمّ جاى)

الصرخه طلّت م الشقوق
الفاضية
في جدار السما
وطلعت أجرى
زىّ باقى المرعوبين
سكّيت ورايا
وانفردت بدمعه نزلت
في الخفا
يا خساره كنت بامنِّى نفسى
الليل يأخَّر حبتين
ا

**********

اللحظه صفر

الضلمه بتشد الشراع
وبتعدل الدفّة.. وناويه ع الرحيل
مرساك بيفضى
وعينيك بيركبها الخلا
الصيف
نسيمه ماهوش كتير
والهجرة موسم
بس انت من دلوقتى
موسم هجرتك
مالهوش بديل
طمعك في نور الشمس
نسّاك الحياة
نسّاك خطاويك القليلة

جريك ورا كونك وحيد
عملك.. وحيد
أرضك مواجع
دنيتك غرقانه جوه الألبومات
* * *
الليل طلع ع المركبه
شابك في إيده شنطتك
الليل رحل قّدام عينيك
والفجر واقف ع الحدود
تأشيرتك الهلكانه قِدْمِتْ
مادخّالوش
* * *
ع الرملة نِخّ
دلوقتى وحدك... والفراغ

الأرض من حواليك... مافيش
صفارة المركب... مافيش
إنتَ... مافيش
على صفحه واكلها البياض
قطرك وقف
والصبر مفتاح
إنت ضيعته بإيديك
* * *
مشهد نهايتك... والبداية
الصفر تحتك
يا تنطّ في الحفره
وتفضل مستخبِّى
يا تسيب إيديك
تمسك طراطيف الخيال

يمكن تطير

**********

فرهده

سور
على ناصيِةْ بيت
ع الحيط متشعلق واد
غلبان
خايف لكلاب السكة.. تشوفه
من خوفه
شمُّوا الريحه وجريوا عليه
نهشوه
وفاتوه من غير جناحات
دمعاتُه بتغرس صوابعها
ف تلابيب الأرض
النزف اتمكن من بواقيه
وف لحظةْ نَشْوَه

حاول يتشعلق تانى
فمات

**********

الغريب

مكتوب على قبر الغريب
ولا طال يعيش
ولا طال يموت
والغربه
كانت سكته
والقبر
فاضى من بداية نشأته
مستنى يندهله الغريب
وينام في حضنه
مبتسم
ويفوت كتير
وكتير أوى
والناس

على مرّ السنين تسأل
على إسم الغريب
طب شكله إيه؟!
طب كام بلد
شافت دموعه
شمسها؟!!
طب ليه رحل؟!
ولا فيش جواب
ولا فيش أمل
تسكت في يوم الأسئلة
* * *
قال التاريخ
إن الغريب
مالهوش ملامح
تترسم

غير العيون
الدبلانين
دايمًا بيظهر للبشر
زىّ السراب
بتشوفه
لكن مستحيل
يوم تلحقه
عايش
بحزنه في الحياة
ولا هوَّ طايل ضحكته
ولا هوَّ طايل دمعته
الوحده بيته
والحيطان حزن وألم
من غير سبب
أو حتى لو كان فيه سبب

عمره
ما حاول يبتسم
* * *
سيدنا الغريب
ما عرفش سكه
ترجَّعه
ما حاولش يعرف
فين بلاده
مؤمن
بإنه مش هيبقى
ف يوم سعيد
غير لما تخلص دنيته
غير لما يلقى تربته
بالحضن واخداه
للسكون
وينام
في قبره مبتسم
ما يهمّهوش إنه يعيش
ما يهمهوش إنه يموت
بس المهمّ
إنه خلاص من بعد ترحال
السنين
ها يشوف نهاية
رحلته

**********




اسود × اسود

كرباج برودة
لَسْوَع الضهر ف شماته
وانتشى
لفحة ألم صابت ملامحى
شدّيت على الوتر
اللِّى باقى في الكمان
وعزفت لحن قديم قوى
كان والدى كل ما يسمعه
يحضنِّى بين دراعاته
ويروح في البكا
أمى تقول: يا ابنى نغم حزنك
بياكل قلبنا
ما كفايه عارفين غربتك

من يوم ما جيت الدنيا
متغطى بعباية حزنها
* * *
أسكت لغاية
ما الكلام يتعب محاوله
وانفرد في الركن واعزف
يخرج أبويا م المكان
-أسمع خطاويه الحزينه-
لحظات سكون .....
أمى تنهنه
فارتكن ع الحيط
وافكّر قد إيه
حسّيت بظلم أنى أعيش
من غير ما أشوفهم لو ثوانى

بيضحكوا!!
* * *
اللحن كان لى مهربى
أتغطى بلحاف الشرود
واسرح
مع الحبّ اللِّى ضاع
قبل امّا ييجى
واسرح
مع اصحابى اللِّى فارقونى
وسابوا جوّه منِّى ضلّ ماسخ
أسرح وبسّ
دايمًا باقابل وحدتى.. ويّا الكمان
ولا عمرى ملّيت صحبته
* * *

أمى وأبويا كانوا حلم ما شفتهوش
كانوا الطيابه والبساطه والنسيم
كانوا الحكايه كلها
لولا مواعيد الرحيل
* * *
صوت انكسار ورق الشجر ع الأرض
بيغطِّى المكان
الهمّ جوّه القلب
بيدقّ الجرس
نعْق الغراب بيدوس على اكتاف الحياه
أصرخ من الخوف وارتجف
مش لاقى حدّ
أصرخ من الخوف وارتجف
مش لاقى حدّ

اركع و اخبّط ع الحجاره
اللِّى بتملا كل حاجه وانتحب
مش لاقى حد
ده القبر مابيديش ودانه للغريب

**********

ضِلّ

حلمك عفى
نفّض ترابك من عليه
غربل لياليك القديمه
وانتقى لحظة فرح
عدّيك شويه
بص من براك عليك
شايف؟ عيونك مقفولين
قاصد تعيش في الضلمه
والليل يبلعك!!
الخوف وإحساس الهروب
حالة كآبه ضيّقه ع الذكريات
فتّح عيونك حبتين
ارغم شعاع الشمس
يحضن نظرتك
مهما يصدّك.. قرّبه
اشتاق للقياك من كتير
وأنت اللِّى ضلّيت الطريق
فاستحمله
* * *
جرّبت طعم النور.. خلاص
طب رأيك ايه؟
أحسن تعيش
وعينيك براح
ولا.. مغمض منطوى؟
صدقتنى
لمَّا نصحتك بالمحاوله؟
أنا كنت محتاج لك تجرّب
دلّنى

إحساسك ايه؟!
نفسى أخطِّى خطوتك
واتخطّى كل الممنوعات
نفسى أعود من تانى ليّا
بس شىء
زى اللِّى كان رابط جفونك
بالسواد
خلانى اخاف!!!
* * *
يا اللِّى وصلت هناك
أنا يمكن أكون ناصح.. وبس
لكنى عايزك
تحتضن إيدى في إيدك
وتشدّنى أوصل لحدّك

أصلى تعبت من العمى

**********

عتمة

سكون الليل
وصوت الموجه
بتعافر في صاحبتها
وتتعارك مع الكورنيش
ونور.. مفقود بقالو كتير
وصوره ليكى
من نبع الخيال طلّت
ولم تفضل سوى لحظات
وعدّتنى
* * *
قابلتك خطوة بتقرب
وكفّ رقيق
بيلمس كفّى يتسائل

وصوت نسمايه بتهفهف
وصمتك لما شُفْتينى
وأنا تحت المطر
واقف ومش شايفك
مانيش عارف
لحقت ف كلمتين أعشق
وادوب.. واتعب
أكيد انتى ملاك
لكن ما صادفشى اللقا بينا
طريق مفتوح
لقا موج العتَم
واقف على ابوابنا
* * *
شهور مرت
ولسه كلمتك
"آسفه"
ما فارقتنيش
أكيد حطّت نهايه للأمل فيَّا
ولكنى رسمت الصوره
جوّايا
وحبّيتك في جوّايا
وسلّمت لعينيك القصه
تتمشى في أحلامى
تغوصى قد ما تعوزى
في إحساسى
وتستهلكنى رؤياكى
فاقف بهتان قصاد البحر
واتعكز على موجُه
ويندهنى الندى

يخبط على الكرسى
وادوّر ع المطر فوقى
ولا اشوفهوش

**********

عميانى

ساعة ما الشمس تقرّب منّى
باعرف إنك موجوده
واعرف إن الشمعه
المرميه ف تقفيصة صدرى
هَتْقِيدْ
بدَّفا بالفكرة الأول
واستنى لما ايديكى تمللى جبينى
حروف "ازيّك"... وافرح
لو تتعطل رجليكى شويه
في زحام الناس
الفرحانه بنهارك
إحساسى بيجيّلى
إنى بقالى كتير مستنِّى

واتعكّز على أقرب حاجه
تطولها إيديّه
لأجل ما اجيلك
فاسمع خطاويكى
بتجرى عليَّا.. تلحقنى
كفّك يحضن كفّى
وامّا يغير الكفّ التانى
تتلفّ صوابعك حواليهم
وتقول ما تخافشى.. أنا جنبك
باشعر إن عينيكى
بتحضن كل ملامحى
فاتخيل صورتك واتملّى
أجمل بنت ف طول الكون
وفْ عرضه


أجمل مخلوق
بتشوفه عيون الناس
عمرى ما شُفْتك
بس كلامك لما بياخد
ودنى معاه
ما اسمعشى المخاليق التانيه
بيأكّد لى
إن الواحد مش محتاج لعينين
علشان يعشق نور
مش محتاج غير للشمس
تدفّى الروح.. وتطمّنها
تدّيها الإحساس.. بالفرحه
أصل شروقك
بينسِّينى الليل الراكن

ع الشبابيك
ويحسِّسنى إن مافيش في الدنيا مفتَّح
غيرى