ديواني الأول ... شنطة وضبة ومفتاح

خمسه ابتدائي


بنوته
من قلب النغم
بتخطي خطوتها
البسيطه
ع الطريق
تتهز جدران الحياه
من بين كراكيب
البشر
فرع المحبة
ينتزع جدره الحزين
و يشب
يمسك ف السما
يلضم خيوط الريح
تبوح
وتوشوش الطير
المعدي
تنتشي ضحكاته
من كتر الفرح
لما تقوله عن حكاية
بنت لسه قلبها
ملفوف
بحبات المطر

... ... ...




بنوته
بتخش القلوب
ويا الهوا
تحضنها أنفاس
البشر
تترد فيها الروح
تغني للخضار
التلج يسحب نفسه
من بين الشقوق
ينزل ف حضن الموج
يدوب
ويبل راسه
بالدفا
يروي العطاشا
ف الجناين
تترسم ف عيونه
صوره صغيره
ف يمد آخر نظرته
جوا البراح
يلمح زهورك
ف انسجام بتغني
بادئ لحنها
والورد الاحمر
والبنفسج
مرصوصين
قدام سنابل
ضحكتك

... ... ...


بنوته
جوا عنيها
ليل
طيب أوي
بيشد كل الناس
تجاور جنته
اللؤلؤ المرشوش
عليه
بيعبي م الأنوار
زكايب
ويهادي بيها
المحتاجين
بيسيب على كل المداخل
والمخارج
فرحته
للكون سبيل
قرب ودوق
طعم الليالي الطيبة
وان كان ف قلبك
أي جرح
ف عنيها بس.
هتلاقي كل الأدوية

الحكم نهائي




مكتوب على بابك
خطر
فيه كهربا؟
ولا الحكاية مكهربه؟!
ولا انتي حته م القمر!!!
خايفين عليكي
من الهوا
بيحوطوكي بحلم
دايب ف السهر
علشان يتوه
مين يعشقك
ف الليل
وينسى المسأله
وتعيشي وحدك
ف المطر
يغزل مساكي
بضحكته
ويرمي ورد
على البشر
... ... ... ...

جواكي سحر
مالوش دوا
بيخلي قلبي يفط
مني
يروح يدور ع الشجر
ويخبي راسه
ف وسطهم
ويقوللي مستني
السفر
يا تاخدني تبعد
من هنا
يا تفك سحري وننتهي
يا تروح تسلم للقدر
مستغربه؟!!
قلبي على حبي انفطر
وانتي يادوب بتفكري
تديني ضحكه
قصيره
وتقولي واحد واتعذر
شحات أنا؟!
والله قلبك ده حجر
لأ مش حجر
قلبك ده حاجه حنينه
بتحط بلسم
ع الألم
الغلطه منى من البدا
بعشق عنيكي
ف صمت عالي
مالوش مدا
سايب غديرك
والهوا
قاعد ببحر
ف الندم
اصل انتي حاجه بتتولد
علشان تحرك
ف الصنم
بتخلي عنده شعور
يكسر رسمته
ويدخله عندك
من ابواب الخدم
وأنا مين يا ناس
ف الدنيا دي
علشان اكون
بس الحكم؟
واحكم عليكي
بقسوتي
إن انتي احساسك
عدم
... ... ... ...

دلوقتي هطلب م القلم
يخرج
يسيب المقلمه
يكتب هواكي ف غنوته
يا ام الليالي منسمه
ما يشوفش غيرك
دنيته
وان صابه نورك
بالعما
ده الحب هو قضيتي
وانت اللي ماسكه
المحكمه

الساعه 2 الفجر




وحشتيني
وبعمل نفسي
مش عارف ..
وحالة رفض وخداني
عشان انكر
ومش قادر ..
ملكت ف قلبي
شئ مجهول
لقيت شوقي للقياكي
مالوش مرسا
بيتعلم يكون بحار
على إديكي ..
واحس إني ماليش غيرك
وادوب فيكي
الاقيني بعافر لاجل ما ارجعلك
وحيرة قلبي وعيوني
بتسأل ليه ؟!!
وحشتيني
... ... ... ...



عيون الناس
تلوم قلبي على اللهفه
ومش عارف
أداريها..
ياأحلى عيون
وأحلى جنون
وأحلى طريق
بخطيله..
يا قصة حب
بتمنى أعيش فيها
واكون فارس لاحلامك ..
وانا جنبك
بحس الدنيا
شئ تاني
واحس انك كلام
مرسوم على جبيني
واحس انك حقيقتي
وكل تكويني..
والاقيني
بقلبي وروحي بندهلك
وحشتيني ..

نزلة حب



إحساسي بإنك جوايا
علمني أحب
علمني اتمرد
ع الماضي
علمني أثور
واكتبلك ع الحيطه
بحبك
والله بحبك
والعالم يشهد على إنك مولاتي
... ... ... ...

من ساعة ما قابلتك
بحلم
والحلم بيكبر
ويعدي
ويسافر على نجمه رقيقه
وف عز البرد
يتلملم
وينام عى كفك
وف بعدك
يتغطا بقربك
ويحس العالم
وكإنك الشمس بتطلع جواكي
... ... ... ...

أحيانا
بتخيل نفسي
قاعد وياكي
وبتكلم
واتأمل ف عنيكي
السمرا
واستغرب جدا
على حالى
واما اسأل
حبيتك ليه ؟!
القاني بجاوب حبيتك
مش عارف ليه ..
... ... ... ...

صدقتي
بإنك مولاتي
خليتي كياني بيتلخبط
من بس خيال
أُمّال لو شفتك
قدامي..؟!
قدامك
شعري بيتلجلج
وحروفي
بتسرسب مني
وعيوني
بتتغرب عني
وامبارح
بيخش ف بكره
والشارع
بيضيق ع الآخر
وبيرجع يوسع ع الآخر
وف لحظة ما اتمالك نفسي
إحساسي
بيكبر جوايا
إحساس بالحب
... ... ... ...


أنا عايز اقولك متشكر
على كل دقيقة
وهبتيها للقلب
المتعلق بيكي
أنا عايز اقولك بهواكي
أنا عايز اقولك مش قادر أتحرك
من غير إحساسك
ده انتي
اللى غرامك علمني
جوايا أدوّر ع الآتي
علمني اتمرد ع الماضي
علمني أثور
واكتبلك
على كل ملامحي
والله بحبك
يا ملاكي
والله بحبك
والعالم
يشهد على إنك مولاتي

لمبه سهّارى



مساء الحب
يا منديلها يا معطر
ويا صورتي
وانا بقلبي قريب منها
ويا جوابات
بتتمنى تشوف الضي
ما بتفارقوش خيالي
لما تتوضوا ف كفيها
ف نظره
من عينيها
طيبه ... سمحه ..
ف صوت خافت
بيطلع م الخجل
يقفل شفايفها
... ... ... ...

مساء الشمس
بتصلي
لرب الكون
وتسهر تدعي وتبسمل
عشان تحفظ
تراتيلك
عشان تبقا كما إنتي
على فطرة جنين
مولود
ملايكة ربنا لفاه
بتوب أبيض
طمأنينه
وروح بتحن ع القسوة
وتديها مفاتيح
الأمل
ترسم على وش الحياه
بسمه
... ... ... ...

مساء الصبر
بيسجل حروف إسمي
ف كشف طويل
لأحبابك
واخش الفصل
أتعلم
أكون عطشان
وابل الريق بكلمه
طبطبت مره على ودني
واكون هلكان
وامد النظره
واتعكز على صورتك
واكون قلقان
ولا اخافشي
لأنك مهما هتغيبي
بتستوطني ذاكراكي
وتحضني ..
... ... ... ...

مساء الحلم
بيبسبس على نورك
ويتشعلق
ف نظره
إنتي مش قاصده تبصيها
وكلمه
انتي مش ناويه تقوليها
وسرب بعيد من الأحلام
بيتمنى يقربلك ...
... ... ... ...

مساء الطيبة
يا عصفوره بتزقزق
مع النسمات
ويا نسمه
بتتمايل على نولك
ويا كلي
ويا كل اللي ما قدرتش
اقولهولك ...

عادة سرية


جوه الفرنده
مددت همك
يستريح حبتين
قاعد تفكر
والعينين
بتدوس على طرف الرصيف
خايفه تهوّي
تختفي وسط الضلام ..
أسفلت شارعكوا
القديم
أصبح مرايه
للحياه
أصبح خريطة
للأمل
والفجر
مستنيك بعيد
وانت
بتستناه يجيك
... ... ... ...

علبة سجايرك
خلّصت
والروح
بتتعلق ف آخر عقب
فيها
هى اللي بقيالك
هنا
هى الصديق
وان فارقتك
وانت حزين
هتبوح لمين ؟!
عن كل حاجه
بطئت فيك العقارب
مين هيناجيك؟!
دخان سجايرك
دم بيثور ف الوريد
كل الليالي
الطيبة
حكمة جدودك
إحساس شرودك
إن الحياة متعلقه
حوالين رقابتك
من يوم ميلادك
... ... ... ...

بتمد إيدك
تفتح الراديو بهدوء
- آخر محاوله لاستعادتك –
اغنية الست
الحميمة ..
تفتح حوار
مع كل شريان جوا منك
خد دروس
عن أي ثوره ف التاريخ
اللمبة
فوقك تعترض
تحبس ضياها
والست تسكت
أفكارك السوده
تهاجمك
تعتقد إنك هترجع
للسكون
فجأة
حقايق صمتها
تخرج أدان
والفجر
بيزق النجوم
يعلن وجوده
أمك
تنادي ع المخده
اللي ف سريرك
وترد من آخر مكان ف الشقه

حاضر

لحظة زوال


كربونه
من نفس الإحساس
الماضي
شفّت كل اللي حاولت أنساه
طبعتلي فوق الكراسه
إسمك
إتحسست النبض
الساكن بين شراييني
إتلخبطْت
إتمسمرت مكاني
ف حيره
أعمل إيه ؟!
... ... ... ...


سماعة التليفون
شدتني من إيدي
وسندت أحلامي
على ضهر الحيط
على كنبة أشواقي
ارتحت
وطلبتك.
لحظات بتمر بعصبيه
والعالم
بيدور قدامي
اللهفه
حطت على جرحي إيديها
فسرحْت

... ... ... ...

المشهد
ما فارقشي عينيه
المترو
بيدوس ع الوقت
وبيسرق دقات القلب
الناس ملهيه
ف ركوب ونزول
وسباق ع السلم
الواصل بينهم والدنيا
وف آخر كرسيين
قاعدين انا وانتي
بنبص لبعض
وبنحضن النظرة
ما بينا
والحب
واقف مستني الحكم
... ... ... ...


- عايزاني
- طبعا
- طب نعمل ايه ؟!
- مش عارفه
- قولي بحبك
- خايفه
( دقات الساعة
بتقرب من ودني
ف صمت )
- عايز اقولك .....
- ما تقولهاش
لسه العمر طويل
قدامنا
لسه ماحدش فينا
اتعرف ع المكتوب
... ... ... ...


تهت شويه
وقبل ما ارد
وقعت فجأة النظرة
وصرخِت
لما مشيتي
وآخر كلمه ف ودني
بتزعق
رقمك مش موجود
ف الخدمة ...

مذكرات النوتة الصفره



أنا
ما امتلكشى ف الحياه
الا التمنى
وشوية الأحلام ف جيبى
والضحكتين
المرسومين ساعة صفا
ودموع قديمه
خبيتها جوه المحفظه
... ... ... ...


أنا
كل ليله بندفن
جوه السرير
واغرس عيونى ف المخده
وانتظر
النوم يجينى
ينتهى
كوابيسه مع أحلامه
شنطه
كل ليله بتتملى
أيام طويله
... ... ... ...

أنا
ف المرايه كل يوم
بلمحنى ضل
هامش كبير
مليان كتير م الأسئله
والصفحه فاضيه
ملهاش ملامح تتنقل
غير الصفار
وكأنها
من كتر ما اتسابت وحيده
ملت حكاوى الحبر
من قبل الكتابه
واتلملمت جوه الخريف
... ... ... ...

أنا
نفسى اكون انتى البريئه
نفسى أكون
الروح بتتمايل
على تفاصيل ملامحك
تنفلت
تحضن خبايا نظرتك
تلمس كلامك
تنسحب
وتغوص ف نسمات الحروف
إحساسى بيكى
طفل شارد ف العيون
إحساس موارب
ملهوش عناوين تنحفظ
شهادات ميلاده كلها
من غير أسامى
... ... ... ...

أنا
مش بحاول أنفلت
من دنيتى
أنا بس محتاج للطريق
حاولينى تانى من جديد
قنديلك المفرود
على وش الحياه
بيزق شمعة سكتى

خلينى ادوق
من نهرك المليان حنان
خلينى اطيب
من جرح مالقتلوش سبب
دلينى أوصل مطرحى
أو سلمينى
للهرووووووووووب

حالة


فات العمر
والأيام الحلوه
اتحطت ف الالبوم
وحدك
قاعد جوه الكرسي
صوت المطره
بينقر قلبك
قبل ما يخبط ع الشبابيك
عجِّز حلمك
سِنَّه
بسِنَّه
والأحاسيس
جواك اتغطت بالأوجاع
ألم الوحده
ألم الحس الضايع
فيك
او إحساسك إنك عاجز
مش ف إيديك ..
... ... ... ...


ضاع العمر
وحبك مات
كدبوا عليك
لما قالولك إن الحلم هايفضل
عايش
لما قالولك إن النور هايعيش
جواك طول أيامك
لما قالولك إن حبيبتك مش هاتسيبك
إنت
بكل بساطة رضيت
تفضل عايش
ف الأحلام
وانت لوحدك
دمعك
غطّى جناب الكرسي
انت لوحدك
ميت فيك
صوت المطره
بيخنق روحك
دمعك جوه عنيك
بيزيد
وبيتحجر
رجلك تعبت
م الأيام
م الأوهام
إيدك
همك ربط فيها
وِاتحداك
وانت خسرت
بدون أسباب
صوتك
جوه لسانك ضاع
وانت لوحدك
موتك قرب
... ... ... ...


لحظة بلحظة
صوت المطره
خلاص بيروح
دمعك
فرَّغ كل حمولته
عينك قفلت
روحك
سابت حلم حياتك
روحك
سابت حتى حياتك
غمض قلبك
إرحل زي ما عمرك فات
إعرف إنك حتى ف موتك

بردو لوحدك

تلاتة 4×6

(1)

تصاويري
رافضه تكلمني
والكاميرا
الملزوقه ف عيني
من يوم ما وعيت
بتزق اكتافي
وتبعدني
وتغمض عدستها
وتبكي
فلاشات مخنوقه
أباجورتي
السهرانه ليالي
تونسني
قطعت شرايينها
انتحرت
علشان سرحاني
كان حاضن صورتك
... ... ... ...

(2)
الأوضه
غطت ملامحها
ب ستاير جلد
والبرد بيتسحب
من تحت الباب
المتوارب
كوباية القهوة
المانسيه
فوق الكميدينو
بردانه
بتسب وتلعن
ف اليوم
اللى قابلتك فيه
إحساس الوحدة
فظيع
بهَتَان افكارك
أفظع
بكتير
وانا مش غاندي
والصبر
ف زمنا الحالي
مالهوش رجلين
... ... ... ...

(3)
الصورة بتاعتك
خذلتني
إديتني إيحاء
بسقوطي
ف نتيجة الثانوية العامة
ووقوفي
قدام والديا
عريان
ما بيسترنيش غير نظرتهم
والحزن عليا
أسطورتي
إيماني بذاتي
تاريخي
مولود ف مرايتي
وان كنت غلطت
وسمحت لكيوبيد
يخدعني
مش هاسمح لدليله
تكسر معبد
شمشون

ورقه ف ظرف



على الشباك
لمحت الشوق
بيتسرسب من القله
وحبه كمان
لقيت الدنيا بتمطر
أسا وحرمان
مليت القله ع الآخر
وحطيتها كما كانت
على الشباك
... ... ... ...


قفلت الشيش
وسبت النور
بيتخانق مع الكشاف
مسكت جوابك
المرشوش بلون دمعي
قعدت اقراه
ودي المره ال .....
ما اناش عارف
ماانا اللي قريت
وانا اللي بكيت
لحد الدمع
ما نسيني
يا انا اللى نسيت
... ... ... ...




ساعات وساعات
تخطيني بدون ما اشعر
لقيت الليل
بيحصرني فركن
بعيد
حاولت اهرب
- بدون ما اقصد -
كسرت الضي
جوايا
وبرايا
وف الكشاف ..

بورتريه



كملي باقي حياتك
مش معايا
مش هحاول افترض
فيكي الأمل
واعتبر إنك ف لحظة
تقدري تاني
الرجوع
انتي
سبتي كل حاجة
للدموع
للسهر .. للإنتظار
جوه مني زرعتي نغزه
زرّعت آلام كتير
إحساسات
بالإنكسار
بالندم
ويا الجراح
واكتفيتي بالمشاهدة
واعتذار
زي ما تكوني غلطتي
غلطة تافهه
زي ما تكوني كسرتي فازه
مانسيه ف صالونك
مش كسرتي قلب
حبك
قلب
عاش ليلك
يغني للنهار
... ... ... ...


اضحكي
و اعملي من كل كلمه
قولتها لك بهلوان
ركّبي لوحه
بسيطه
من خيالي
إرسميني جوه منها
أي حاجه
حتى لو ....

لو بيجامه مقطعه
جوه الدولاب
لو كتاب
من غير غلاف
لو عروسه
ماريونيت
إفرديني
زي أوراق
التاروت
إسحريني
غيِّري كل الحقايق
خلِّي كفري
بالمشاعر ينتصر
خلِّي بيكاسو
العنيد
تاني فيا يتولد
يرسمك
خلفيه باهته
( بورتريه )
ليكي
وإنتي بتضحكي

........... = مافيش


آخر ورقه
بتمد إيدينك تقطعها
وتكرمش إحساسك فيك
وف ركن الأوضه
.. بتحد ف
حلمك
وكأنك
من غير الروح ..
هاتعيش
بتثور ..
وتثور ..
وتثور ..
براك
والشرخ ف جواك بيزيد
وشك
عمّال يحمر
من الخنقه
والضلمه بتنام ف وريدك ..
وتمدد
وانت الموجوع
همدان بيعافر ف الحيطه
ومالوش رجلين

... ... ... ...





دقنك طولت
جلدك ف بجامتك عيط
من طول السجن
وصوتك راح
قدامك تل سجاير طافيه
مع إنك
كنت
بتكره
حتى
تشم
ريحتها
أسبوع .. ف التاني ... ف التالت
عمّال بتفتفت-أح ا س ي س ك-
ضيعت كتير
مع إنك عارف
إنت وهى ( خلاص خلاويص )

... ... ... ...

إنت بتغرق جوه سريرك
هى بتضحك .. تفرح .. تلعب
إنت وحيد
هى ف وسط الناس بتغني
إنت .. مافيش
هى ما فيش حاجه
بتجبرها .. تفكر فيك
إنسى وجرد نفسك منها
إرجع للحظه اللى انت رميت
أحلامك فيها
وامسك جلابية إحساسك
وبلاش تتمرغ جوه ترابه
أكيد مش ليك

تحويله

دبّس حكاوي أجندتك
فى الذكريات
لملم مرارها بحلوها ف السندره
إقفل ضرفهاع القديم
واديها ضهرك ..
إنطلق
إاوعاك تبص وراك ..
تقع ..
تشتاقلها
... ... ... ...


ف البانيو سقّط كل شئ
جلدك
مشاعرك
دنيتك
الدش غاوي غنوتك
دندن معاه
" الدنيا ريشه ف هوا
طايره بغير جناحين
واحنا النهارده سوا
وبكره هنكون فين "
... ... ... ...


ادخل بجرأه ع الدولاب
غير ملامح هدمتك
ولِّد
من الجوه العليل ..
إنسان جديد
إديله حلم يعيش معاه
أخرج من اللحظه اللى عدت
ع اللى جاي
حاول تعيش
... ... ... ...


دراعات شارعكو مفتوحين ..
مستنياك
إنت الوليد
وسنين حياتك
ماشيه جنبك
ع الرصيف ..
بتطمنك
خدها ف حضنك
حسها ..
إحساس بيضحك
إضحك .. وسيب الضحكه
ترمح ف الخلا
إضحك .. وغير شئ بشئ
إضحك .. بفرحه
العمر ف إيديك كمله
واياك تحسس ع اللى فات
تلقاك رجعت
السندره

مرسال على ورقة دمغة


بره الأوضه
العالم .. مخلوق متغير
مِدّيني قفاه
ولا عارف ابص لوشه
اتأكد هو بيضحك ..
ولا مكشر
ولا عارف ازق الخطوة ..
ألاحقه
مليار وشويه من الأحاسيس
ف البعد بيداروا ف غيرهم
محروق امبارح .. وعمايله
ملعون الجاي
لو إنه ادارى ف ريح سعرانه
يا يشوفنا بحاجه جديدة
تجمع أحاسيسنا ف ريحُه
يا بلاش
مش ناقصه صداع
... ... ... ...


انا سبت الأوضه بتاعتي
ف لحظة ض ع ف
كان نفسي أجرب
واشهد بالحق :
تجربتي من الأول فشلت
مع إن جيراني
اللى ف أوضتي قالولي :
اوعاك من بره
بس أنا جوايا شيطان
بيحب ينخرب
لا بد يدوق
علشان يتعلم طعم السم

... ... ... ...

كل اللى انا خدته معايا
الشنطه الصفرا
وعيون بتزوغ
وتلاغي ف طوب الأرض
ولا خدت الساعه
ولا خدت هدومي
ولا حتى حاولت اعمللى بطاقة
كان كل اللى هاممني ساعتها
أخرج .. وخلاص
عِندي ..
ودماغي المليانه حجارة
ما بتسلمش
ف بلدنا كانوا بيقولوا عليا مدَب
بس الموضوع م الآخر .. غيّه
أنا غاوي اتنطط
وأعافر
وأقول الحق
ما بحبش حد يكلبشني
ويقوللي سجنك حريه !!!!
وبرغم إن الشنطة اتسرقت
مش فارقه معايا
يوم ولا اتنين وهفصّل غيرها...
... ... ... ...


مرسال للأخ
اللى قطعلى تذكرة الطياره
اياها
متشكر جدًا
إديتني الفرصه عشان اتعلم
إازاي اتغير .. وأحاول اغير
مادِّيش الخاين ضهري
بس اتمنى لما ارجع أوضتي ف يوم
ملقاكش